About Me

My photo
Greater Noida/ Sitapur, uttar pradesh, India
Editor "LAUHSTAMBH" Published form NCR.

हमारे मित्रगण

विजेट आपके ब्लॉग पर

Monday, May 30, 2011

(46) सत्य जो होतो बिरंचि मैं तौ

कायर को भुजहीन बनावतो, शूरन चारि भुजा रचि देतो
दानिन के कर देतो बड़े करि, सूमन के कर ही हरि लेतो
कर्ण विहीन  बनावतो चोरन, नासिका वक्र छिछोरन देतो
मूक लबारन को करतो, अरु सत्य की वाणी गिरा भरि देतो.

दंभिन को कृश देतो शारीर, विनम्रता में ममता भरि देतो
धीरन में रचतो पुरुषार्थ, अधीरन की क्षमता हरि लेतो
कामिन देतो कपाल पै घाव , सुजानन के मुक्ता जड़ी देतो
निंदक को स्वर देतो उलूक, कवीन को कोकिला सो स्वर देतो.

भोगिन को करतो मुख सूकर, योगिन तेज ललाट पै देतो 
दुर्जन नासिका हीन बनावतो, सौम्यता साधुन में भरि देतो
देतो दरिद्र कुचालिन को,व्यभिचारिन नेत्र विहीनता देतो 
लम्पट देतो विडाल सो आनन, ज्ञानिन में पटुता भरि देतो .

सींग उगावतो हिंसक के, दयावान में वास वसंत को देतो
लार बहावतो लोलुप के, उपकारिन को कल्पद्रुम देतो 
कील उगावतो क्रोधिन के मुख, सौम्यता में सुचिता भरि देतो 
''सत्य'' जो होतो बिरंचि मैं तौ, सुविचारिन आस सुधा भरि देतो.    

0 comments: